Appeal Letter to TPiE

༈ དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་ཆེད་འཛུགས་ཁྲིམས་སྒྲིགས་བསྐྱར་བཅོས་ཚོགས་ཆུང་གི་ཚོགས་གཙོས་དབུས་ལྷན་རྒྱས་ཀྱི་དྲུང་དུ།
ཆེད་ཞུ།

ཕྱི་ལོ་༢༠༢༣ ཟླ་༧ ཚེས་༡༧ ཉིན་གྱི་གསལ་བསྒྲགས་ནང། (ཚོགས་པ་དང་མི་སྒེར་སུ་ཐད་ནས་ཁྲིམས་སྒྲིགས་བསྐྱར་བཅོས་དང་འབྲེལ་བའི་དགོངས་ཚུལ་མཆིས་ཚེ་ཡིག་ཐོག་ནས་ཕྱི་ལོ། ༢༠༢༣ ཟླ་ ༩ ཚེས་༢ མང་གཙོའི་དུས་ཆེན་བར་ཚོགས་དྲུང་ལས་ཁུངས་བརྒྱུད་འབུལ་དགོས་) ཞེས་པའི་དགོངས་དོན་བཞིན། ་་་་་་་་་་་་་་་་་་་་་་་་་་་་་་་་་་་་་་་་་་་་་་ཚོགས་པའི་མི་མང་ཐུན་མོང་ནས་གཤམ་འཁོད་དོན་མཚན་དྲུག་པོ་འདི་དག་ཐད་དགོངས་བཞེད་ཀྱིས་བཅའ་ཁྲིམས་སྐྱར་བཅོས་ངེས་པར་དུ་གནང་རྒྱུའི་རེ་བ་ཡོད།

དང་པོ། སྤྱི་ནོར་༧གོང་ས་མཆོག་གིས་ཐུགས་བརྩེ་བ་ཆེན་པོས་བོད་མི་རྣམས་ལ་གསོལ་རས་བསྩལ་བའི་ཀ་བ་གསུམ་ལྡན་གྱི་མང་གཙོའི་ལམ་ལུགས་ཡང་དག་པ་དེ་ད་ལྟ་སྣུམ་ཟད་ཀྱི་མར་མེ་བཞིན་དུ་གྱུར་པའི་གནས་སྟངས་འདིའི་རྒྱུ་རྐྱེན་གང་ཡིན་ལེགས་པར་དཔྱད་ན། འབྱུང་ཁུངས་ཀྱི་རྩ་བ་ནི་བཙན་བྱོལ་བོད་མི་རྣམས་ལ་རང་ཉིད་ཀྱི་ཆོལ་ཁ་དང་ཆོས་རྒྱུད་སྤྱི་འཐུས་འོས་གཅིག་གྱུར་མེད་པ་དེའི་རྐྱེན་གྱིས་བྱུང་བ་ཞིག་ཡིན་པ་ནི་འདས་པའི་ལོ་བཅུའི་ནང་༧གོང་ས་མཆོག་གི་བཀའ་དགོངས་ཇི་བཞིན་དུ་ཤར་བསྐྱོད་བྱེད་མཁན་ཞིག་དང་། བོད་མི་མང་དང་། བོད་མིའི་སྒྲིགས་འཛུགས་སྟེ་སྤྱི་པར་བསམ་བློ་ཡོད་པའི་རྣམ་དཔྱོད་དང་ལྡན་པ་དག་གིས་མཐོང་ཆོས་སུ་སྒྲུབ་པ་ནི་སྨྱོན་དུ་མེད་པས་འདིར་ཞུ་དོན་གཙོ་བོ་ནི་བོད་མི་ལོ་བཅོ་བརྒྱད་ཡན་རང་དབང་བདེན་པའི་ལག་དེབ་ལྗང་ཁུ་ཡོད་པ་རྒྱལ་ཁབ་དང་ལུང་པ་གང་དུ་ཡོད་མེད་ཁྱད་མེད་ཐོག་གདམ་བྱ་འདེམས་བྱེད་ཀྱི་སྤྱི་འཐུས་འོས་གྲངས་གཅིག་གྱུར་ངེས་པར་དུ་བཟོས་ནས་བཅའ་ཁྲིམས་ནང་བཀོད་དགོས།

གཉིས་པ། ཆོལ་ཁའི་སྤྱི་འཐུས་འདེམས་ཕྱོགས་ཐད་དཔལ་ལྡན་སྲིད་སྐྱོང་གི་འོས་ཤོག་ཆོལ་གསུམ་དབྱེར་མེད་མི་མང་བྱིང་ནས་འདེམ་མཆོག་པ་བཞིན། ཆོལ་ཁ་རེ་རེའི་སྤྱི་འཐུས་ཀྱང་ཆོལ་གསུམ་མི་མང་ཡོངས་རྫོགས་ནས་འོས་གཅིག་གྱུར་གྱིས་འདེམས་ཆོག་པའི་བཅའ་ཁྲིམས་ལ་སྒྱུར་བཅོས་ངེས་པར་དུ་གནང་ཐུབ་པ་ཅིས་ཀྱང་ཞུ།

གསུམ་པ། ལར་ནས་ཆོས་རྒྱུད་སྤྱི་འཐུས་རྣམས་དེ་སྔ་དགོས་འཁོ་ལ་བསྟུན་ནས་འཇོག་པར་ཡང་། ད་ཆ་བོད་པའི་སྤྱི་ཚོགས་ནང་དགེ་འདུན་པ་རྣམས་ཆབ་སྲིད་ཀྱི་མདུན་ན་དོན་ནས་ཕྱག་ལས་གནང་དུས་མི་མང་བྱིངས་ལ་མི་ཕན་པའི་ཁར། ཆོས་སྤོངས་ཀྱི་ལས་གསོག་པའི་རྒྱུ་རུ་འགྲོ་རྒྱུ་དེ་ཁོ་ན་ལས་བོད་སྤྱི་པ་ལ་ཕན་པའི་ཕྱག་ལས་གནང་བ་ཞིག་ངེས་དོན་དུ་དུ་ཡོང་གི་མི་འདུག་པས་མདོར་ན་ཆོས་རྒྱུད་ཁག་གི་སྤྱི་འཐུས་རྩ་བ་ནས་དགོས་ཀྱི་མེད།

བཞི་པ། གལ་སྲིད་ཆོས་རྒྱུད་སྤྱི་འཐུས་ཀྱི་འོས་བསྡུ་ནི་གྲྭ་བཙུན་ཙམ་ལ་དམིགས་གསལ་མིན་པར་མི་མང་བྱིངས་ལ་འོས་ཤོག་ཕེན་རྒྱུའི་ཐོབ་ཐང་གཅིག་གྱུར་ཡོད་དགོས། གང་ལགས་ཞེ་ན་བོད་མི་སྤྱི་བོ་གནམ་བསྟན་ཡོངས་རང་རང་མོས་ཕྱོགས་ཀྱི་ཆོས་ལུགས་མེད་པ་གཅིག་ཀྱང་ཧ་ལམ་མེད་ལ། ཆོས་རྒྱུད་སྤྱི་འཐུས་ཀྱང་བྱེད་ཆོག་པ་དང་དེ་སྔ་བྱེད་མྱོང་བ་ཡིན་པས་ཕྱོགས་གང་ནས་བལྟས་ཀྱང་སྐྱ་སེར་དབྱེར་མེད་འོས་གཅིག་གྱུར་བཟོ་རྒྱུ་དེ་བོད་མི་སྤྱིའི་ཐོབ་ཐང་ལགས་པས་བཅའ་ཁྲིམས་ལ་འགྱུར་བ་ངེས་པར་དུ་གཏོང་དགོས་པས་དེ་ལུགས་དགོངས་བཞེད་ཡོད་པ་ཞུ།

ལྔ་པ། ཕྱི་ལོ་ ༢༠༢༢ ཕྱི་ཟླ་ ༡༡ ཚེས་ ༡༥ ཉིན་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་ལགས་བགྲེས་ཡོལ་དུ་ཕེབས་པ་ནས་དུས་ད་བར་ཁྲིམས་ཞིབ་པ་ཆེ་བའི་ཞབས་བཀྱགས་དེ་ཁ་བསྐོང་མ་ཐུབ་པར་ལུས་པ་དང་གཅིག དེ་བཞིན་གྲོས་ཚོགས་སྐབས་གཉིས་རིང་དཔལ་ལྡན་བོད་མི་མང་གྱི་བཀའ་ཤག་ནང་བཀའ་བློན་གཉིས་གསར་དུ་བསྐོ་མ་ཐུབ་པར་སྟོང་པར་ལུས་པ་འདི་དག་སྤྱི་འཐུས་ལྷན་ཁང་གྱི་མཛད་གཙོ་རྣམ་པའི་ཐུགས་འགན་ཉག་གཅིག་ཡིན་པ་སོང་ཙང་ད་ལམ་ཁྲིམས་ཞིབ་པ་ཆེ་བ་དང་བཀའ་བློན་གྱི་ས་མིག་རྣམས་ངེས་པར་དུ་ཁ་སྐོངས་ཐུབ་པ་ཅིས་ཀྱང་ཞུ།

དྲུག་པ། བཀའ་སྤྱི་གཉིས་ཀྱི་དམ་འབུལ་ཞུ་རྒྱུ་ནི་དེ་སྔ་བོད་མིའི་བཅའ་ཁྲིམས་ནང་གསལ་བཞིན་ཚིགས་དོན་ལ་ལོག་བཤད་མེད་པར་ཚིགས་ཟིན་ཇི་བཞིན་དམ་འབུལ་ཞུ་རྒྱུ་དེ་འགྱུར་བ་མེད་པར་འཇོག་པའི་རེ་བ་ཞུ་རྒྱུ་ལགས་སོ།།

ཕྱི་ལོ་༢༠༢༣ ཕྱི་ཟླ་་་་་་་་་་ཚེས་་་་་་་་་་ཉིན་རེ་འབྲས་སྨིན་པའི་འདུན་པ་དང་བཅས་ཕུལ།
མིང་། ་་་་་་་་་་་་་་་་་་་་་་་་་་་་་་་་་་་་འདུས་ཚོགས་ནས།

ངོ་ཤུས་འབུལ་ཡུལ།
༡) དགའ་ལྡན་ཕོ་བྲང་ཡིག་ཚང་།
༢) བཀའ་ཤག
༣) ཁྲིམས་ཞིབ་ཁང་།
༤)སྤྱི་འཐུས་ལྷན་ཁང་།

Chokey Tenzin

Chokey Tenzin is not only the founder of “Exile Voice,” but also an accomplished singer and songwriter. As a mature woman, she has become a powerful advocate for justice, speaking out against various forms of injustice. In addition to her activism, she is also a devoted mother who strives to empower her people, particularly the youth. Her vision for her community is one of growth and awareness, where individuals are able to thrive and resist the manipulation and distractions that threaten to hinder progress.