སྔོན་མ་ནས་ཁྱེད་ལ་དགའ་མྱོང་ལ། ད་ལྟ་ལྷག་ཏུའང་ཁྱེད་ལ་དགའ་སོང་།
རྩོམ་པ་པོ། ཨ—བསྟན་འཛིན་བྲག་དཀར།
ལོ་དུས་ཏག་ཏག་ཅིག་སེམས་ངོགས་སུ་གསལ་བོ་མི་འདུག་མོད། ཕལ་ཆེར་ཉིས་སྟོང་ལྔའི་ལོ་ཡིན་པ་འདྲ། དེ་དུས་གཞས་མ་བསྟན་འཛིན་ཆོས་སྐྱིད་ལགས་ཀྱིས་ཚིག་དང་དབྱངས་གསར་རྩོམ་བྱས་པའི་<<སེམས་པ་>>ཞེས་འོད་སྡེར་ཞིག་ཐོག་མར་བོད་པའི་སྤྱི་ཚོགས་ནང་བཀྲམས་པ་དེར། སྟོབས་ཅན་མང་པོ་ཉན་པ་ཡིན། ཡང་ཡང་ཉན་པ་ཡིན། ཧ་ཅང་སྙན་པོ་བྱུང་སོང་། ང་ལ་བག་ཆགས་ཟབ་མོ་བཞག་སོང་། མ་ཟད་བོད་པའི་སྤྱི་ཚོགས་ནང་ནས། གླུ་གཞས་སྒྱུ་རྩལ་གྱི་ལམ་ཁར་སྙེག་པའི་བུད་མེད་ཀྱི་ཕྱོགས་ནས་བཤད་ན། བསྟན་འཛིན་ཆོས་སྐྱིད་ནི་སྐབས་དེ་དུས། རྩེ་གྲས་ཤིག་དང་། ཕུལ་བྱུང་ཞིག་ལ་ཁོང་མོའི་སྐད་ངག་གི་སྒྱུ་རྩལ་གྱིས་གོ་གནས་དེར་རང་བཞིན་གྱི་བཞག་སོང་། དེ་ནི་ཁོང་མོའི་གླུ་གཞས་སྒྱུ་རྩལ་ལ་ནུས་པ་ཡོད་པ་གསལ་བོ་མཚོན་ནོ།།
སྐབས་དེར་རྩོམ་པ་པོ་ང་རང་ལ་ཆ་བཞག་ན། ཆོས་སྐྱིད་སེམས་པའི་གླུ་གཞས་སྒྱུ་རྩལ་གྱིས་སྟོབས་ཅན་ངའི་སེམས་པ་བཀུགས་མྱོང་ལ། ང་སེམས་ཀྱི་གཏིང་ནས་ཁོང་མོའི་གླུ་གཞས་ལ་སེམས་པ་ཐེངས་མང་པོ་ཤོར་མྱོང་། མ་ཟད་དེ་དུས་བསྟན་འཛིན་ཆོས་སྐྱིད་ལ་མཚོན་ན། གཟུགས་དང་ལང་ཚོའི་དཔལ་ཡོན་རྣམ་པར་བཞད་པའི་དུས་ཚོད་ཅིག་རེད་ཨང་། ང་ཁོང་མོ་ལས་ལོ་ན་ཏོག་ཙམ་ཆུང་བ་ཡིན་པའི་རྐྱེན་གྱིས། ཁོང་མོ་གླུ་གཞས་གར་སྟེགས་མང་པོ་ནས་མཇལ་མྱོང་ཡང་། ང་རང་གི་སེམས་ཀྱི་དགའ་ཚོར་དེ་ཁོང་མོ་ལ་ནམ་ཡང་བསྟན་མ་ཕོད། གང་ལྟར། ལོ་ཤས་རྗེས་ནས་ངས་བསྟན་འཛིན་ཆོས་སྐྱིད་ལགས་རྦད་དེ་བོར་སོང་། གོ་ཐོས་སུ་ཨ་རིར་བཞུགས་ཡོད་པ་འདྲ། ངའི་རེ་སྒུག་གི་ལོ་ཟླ་དེ་དག་ཁོང་མོ་གཏན་ནས་ཤེས་མེད་རུང་། ངས་ང་རང་གི་སེམས་ཀྱི་ཚོར་བ་དེ་ཧ་ཅང་རྒྱུས་མངའ་ཡོད་པས་ན། ང་ནི་ང་རང་གི་བརྩེ་བ་ལ་སྤོབས་པ་འཕེལ་སོང་། ངས་ཡིད་ཆེས་བྱ་སའི་མི་དེ་ནོར་མེད་པ་ཧ་ཅང་གི་དགའ་བོ་བྱུང་སོང་།
ན་ནངས་ཀྱི་ལོ་སྟེ། ཉིས་སྟོང་ཉི་ཤུ་རྩ་གཉིས་ཀྱི་ལོ་དེར་ངའི་སེམས་ཁོང་གི་གཞས་མ་བསྟན་འཛིན་ཆོས་སྐྱིད་ལགས་གློ་བུར་དུ་དྲ་ལམ་དུ་ཐོན་སོང་། དེའང་བུད་མེད་ཀྱི་ལས་དབང་སྒོམ་ནས་སྔོན་ལ་ཐོན་སོང་། དྲང་བདེན་གཙུགས་སུ་བཟུང་ནས་མདུན་དུ་ཐོན་སོང་། སྐད་ཆ་དྲང་མོར་བཤད་ནས་ཤར་སེ་ཐོན་སོང་། ས་ཁུངས་ལུང་ཁུངས་ཀྱི་གུ་དོག་གི་བསམ་བློ་དོར་ནས་ཐོན་སོང་། བརྟག་དཔྱད་ཞིབ་འཇུག་གི་རྒྱ་མ་བཟུང་ནས་ཐོན་སོང་། དཀར་ནག་དབྱེ་འབྱེད་ཀྱི་ཤེས་རབ་ལ་དཔལ་ཡོན་འབར་ནས་ཐོན་སོང་། ཧམ་པ་དང་རྫུན་མའི་མགོ་ལ་བདེན་པ་བསླངས་ནས་ཐོན་སོང་། གཞུང་དང་བོད་མིའི་སྤྱི་མཐུན་གྱི་ལ་རྒྱ་བཟུང་ནས་ཐོན་སོང་། ༧གོང་ས་མཆོག་ལ་ཤེས་ནས་དད་པ་ཡོད་པའི་སྒོ་ནས་ཐོན་སོང་། གཡོ་སྒྱུ་ཁྲམ་གསུམ་གྱི་ལྭ་བ་ཕུད་ནས་ཐོན་སོང་། མདོ་ཁམས་ཀྱི་དྲང་ཚུགས་བཟུང་ནས་ཐོན་སོང་། དེ་བས་ན། ང་ནི་ང་ཆུང་དུས་ཀྱི་ཆེས་དགའ་སའི་གཞས་མ་བསྟན་འཛིན་ཆོས་སྐྱིད་ལ་ད་ལྟ་ལྷག་ཏུ་དགའ་སོང་། དད་སོང་། སྤོབས་པ་བསྐྱེད་སོང་། ང་རང་དགའ་སའི་མི་དེ་ནོར་མེད་པའི་དཔང་རྟག་དེ་རེག་སོང་། ངོ་མ་བཀའ་དྲིན་ཆེའོ།།
ངའི་སེམས་ཁོང་གི་སྒྱུ་རྩལ་མ་ལགས། ཁྱེད་ནི་ནམ་ཡང་ངའི་གླུ་གཞས་སྒྱུ་རྩལ་དང་དྲང་བདེན་གནས་ལུགས་ཀྱི་རྒྱབ་རི་དེ་ཡིན་ནོ།། ང་ནི་ཁྱེད་ཀྱི་རྒྱབ་མདུན་ན་དུས་རྟག་ཏུ་ཡོད་དོ།།
2023/10/14 ཉིན་ལ་བྲིས།
Chokey Tenzin is not only the founder of “Exile Voice,” but also an accomplished singer and songwriter. As a mature woman, she has become a powerful advocate for justice, speaking out against various forms of injustice. In addition to her activism, she is also a devoted mother who strives to empower her people, particularly the youth. Her vision for her community is one of growth and awareness, where individuals are able to thrive and resist the manipulation and distractions that threaten to hinder progress.